Олимпиада йўлланмасини қўлга киритган Ҳасанбой Раҳимовнинг допинги юзасидан расмий баёнот берилди

Хусусан, Ўзбекистон спорт курашлари ассоциациясига Бирлашган спорт дунёси United World Wrestling (UWW) федерациясидан ҳам расмий мактуб келиб тушган. Мактуб мазмунида UWW Мустақил антидопинг ташкилоти (ITA) тахлилларига асосланган ҳолда Ҳасанбой Раҳимовда допинг аниқланганини айтилган.    

Хабарда баён қилинишича, Ҳасанбой Раҳимовдан ўтган йили Қозоғистоннинг Нур-Султон шаҳрида ўтказилган спорт курашлари бўйича катталар ўртасидаги Жаҳон чемпионати чоғида олинган допинг-тахлил ижобий натижа берган. Текширув Германиянинг Дрезден шаҳридаги лабораторияда ўтказилган. Раҳимовнинг қон таркибида тақиқланган кломифен (S4 тоифа. гормонлар ва модуляторлар, метаболизм/кломифен) моддаси борлиги аниқланган. 

Айнан Нур-Султондаги жаҳон чемпионатида Ҳасанбой Раҳимов 125 кг вазн тоифасида бронза медалини қўлга киритиш баробарида Токио-2020 Олимпиадаси лицензиясини ҳам расмийлаштирган эди. 

Ўзбекистон спорт курашлари ассоциацияси шуни маълум қилади-ки, Ҳасанбой Раҳимов соғлиғида юзага келган муаммо сабаб шифокор тавсиясига кўра дори воситаси қабул қилган. Аммо, бу восита таркибида тақиқланган кломифен моддаси борлигини билмаган. Спортчи ўша пайтда соғлиғини биринчи ўринга қўйгани учун бироз эхтиётсизлик қилган.