Олимпиадаларда ўзбек спортчиларига мағлуб бўлган машҳурлар

Бу гал эътиборингизни яна дзюдо баҳсларига қаратамиз.

Лондон-2012 ёзги Олимпия ўйинлари. Дзюдо бўйича -60 кг вазн тоифаси чорак финал жуфтликларининг бирида Ришод Собиров ҳамда бразилиялик Фелипе Китадаи тўқнаш келишди. Шубҳасиз, ўша куни рақибидан кучлироқ бўлган Собиров иппон баҳоси билан ярим финалга йўл олди. Бироқ ҳамюртимиз финал остонасида имкониятни бой бериб, якунда бронза медалига эга чиқди. Қизиғи, дзюдо қоидаларига кўра, чорак финалда енгилган спортчи ҳам шоҳсупага кўтарилиш имкониятини сақлаб қолади. Бундан унумли фойдаланган Китадаига иккинчи бронза медали насиб этди.

Рио-2016 ёзги Олимпия ўйинлари. Жаҳон чемпионатининг кумуш медали соҳиби Китадаи ўз юртида ўтган Олимпия ўйинларида медалларга асосий даъвогарлардан бири сифатида эътироф этилди. Бироқ бу гал ҳам чорак финалда имкониятни бой берди. Бронза медали учун ўтиш босқичида эса 22 ёшли Диёрбек Ўрозбоев унинг йўлига тўғаноқ бўлди. Мухлислари кўз ўнгида мағлуб бўлган Фелипе еттинчи ўрин билан чекланди. Диёрбек эса якунда шоҳсупанинг учинчи поғонасидан жой олди. Бу бразилиялик дзюдочининг Олимпиадалардаги сўнгги иштироки бўлиб қолди.

Шу тариқа, Ришод Собиров Бразилия дзюдосининг таниқли номларидан бирини Лондон-2012 ёзги Олимпия ўйинларида олтин медалдан мосуво қилган бўлса, Диёрбек Ўрозбоев Риода бутунлай медалсиз қолдирди.