Олий ўқув юртларига кириш имтиёзини берувчи мусобақа бошланди

Бугун Андижон шаҳрида дзюдо бўйича жисмоний тарбия йўналишидаги олий ўқув юртларига кириш ҳуқуқини берувчи Ўзбекистон чемпионати старт олди. Икки кун давом этадиган мусобақада мактаб, лицей ҳамда коллежларнинг битирувчилари татамига чиқишяпти. 

Ўзбекистон чемпионатида Қорақалпоғистон Республикаси, барча вилоятлар ҳамда Тошкент шаҳридан жами 306 нафар (239 ўғил, 67 қиз) спортчи 18 та вазн тоифасида беллашмоқда. 

Ўғил болалар: -50, -55, -60, -66, -73, -81, -90, -100, +100 кг

Қизлар: -40, -44, -48, -52, -57, -63, -70, -78, +78 кг

Бугун мусобақанининг тантанали очилиш маросими бўлиб ўтди. Унда Андижон вилояти ҳокими Шуҳратбек Абдураҳмонов, Ўзбекистон дзюдо федерацияси бош котиби вазифасини бажарувчи Дониёр Илҳамов, миллий терма жамоа бош мураббийи Фарҳод Тўраев, ҳакамлар ҳайъати аъзоси Нағмонжон Мирзараҳмонов иштирок этди. 

Маълумот учун, мусобақада фақат ўз вазн тоифасида чемпион бўлган спортчилар олий ўқув юртларига имтиёзли равишда кириш ҳуқуқини қўлга киритишади.