Ўқ отиш. Мамлакат чемпионати давом этмоқда

Ушбу мусобақа 2018 йилда бўлиб ўтадиган нуфузли халқаро турнирларга Ўзбекистон терма жамоасини шакллантириб олиш вазифасини ҳам ўтайди.

Баҳсларнинг биринчи кунида 18 ёшгача бўлган ўғил болалар ўртасида биринчи ўринни Тошкент вилояти вакили Бекзод Раҳматуллаев қўлга киритди. Иккинчи ўринни ҳам Тошкент вилоятидан ташриф буюрган мерган Суҳроб Мирзажонов қўлга киритди. Учинчи ўрин эса Қашқадарё жамоаси аъзоси Бурхониддин Эркаевга насиб қилди.

Катталар ўртасидаги беллашувларда Риодаги Олимпия ўйинлари иштирокчиси Вадим Скороваров 244,3 очко тўплаб, шоҳсупанинг энг юқори поғонасидан ўрин эгаллади. Иккинчи ўринни Саидхон Сайфуддинов қўлга киритган бўлса, Бекзод Раҳматуллаев бу борада учинчи бўлди.