Оқ уйдаги UFC турнири битта жангини йўқотди

Бу ҳақда ташкилот раҳбари Дана Уайт маълум қилди.

"Мен сизга бир неча ҳафта давомида тўхтовсиз кард устида ишлаганимизни айтгандим. Афсуски, биз жиддий меҳнат қилиб эришган жанглардан бири ҳозиргина барбод бўлди. Менимча, Хантер Кэмпбелл ўзини ўлдиради. Жанглардан бири учиб кетди ва бу ҳақиқатан ҳам қаттиқ таъсир қилмоқда", - деди UFC раҳбари.

Бир кун аввал Пирс Морганга берган интервьюсида Дана Уайт 14 июнга белгиланган байрам турнирининг карди олтита жангдан иборатлиги, аммо еттинчи тўқнашув билан тўлдирилиши мумкинлигини айтганди. Шунингдек, лига президенти ушбу дам олиш кунлари тарихий тадбир расман эълон қилинишига ваъда берган эди.

Маълумотларга кўра, турнирдаги олтита жангдан иккитаси чемпионлик мақомидаги бўлиши керак.