Ўрта Чирчиқда спортнинг техник ва амалий турлари яна ҳам ривожланади

Ўзбекистон мудофаасига кўмаклашувчи “Ватанпарвар” ташкилоти ёшлар ўртасида ҳарбий ватанпарварлик тарғиботи, спортнинг техник ва амалий турларини ривожлантириш орқали соғлом турмуш тарзини тарғиб қилиш ҳамда “Ватанпарвар” ташкилотининг асосий фаолият турларидан бўлган автомототранспорт ҳайдовчилари тайёрлаш ва мамлакатимизда спортнинг оммавийлигини ошириш каби эзгу - мақадларни кўзлаган. 

Хусусан, Ўртачирчиқ туман кенгаши ўқув спорт техника клубида ҳам спортнинг техник ва амалий турлари билан ўғил-қизлар зўр иштиёқ шуғуланишади. Жавлон Пўлатов раҳбарлик қилаятган ушбу ўқув спорт техника клубида юз нафардан ортиқ туман ёшлари ўқ отиш, ёзги биатлон ва авторалли турлари бўйича машғулотларда иштирок этишади. Ёзги биатлон ва ўқ отиш спорт турларидан тажрибали мураббий Леонид Югай қўл остида, муносиб шароитда шуғулланаётганлар орасида иқтидорли спортчилар кўпчиликни ташкил этади. Шахноза Мирзаева, Шукрона Байбусова, Рустам Ғофуров, Темур Абилхайров, Валерия Радионов сингари шогирдларнинг иқтидорини мураббий яхши баҳолайди. Боиси, улар ўтказилаётган турли даражадаги мусобақаларда кучлилар қаторидан жой олишга муваффақ бўлишади.      

Авторалли бўйича мураббий-спортчи, спорт устаси Алишер Аҳмадқуловнинг олдига тушадиган ралличи вилоятда топилмаса керак. Умрини шу спорт турига бағшида этган Алишер ака вилоят шарафини ўзоқ йиллардан буён муносиб ҳимоя қилиб келмоқда. Бу борада ёшлар у кишидан ўрнак олса арзийди. Клуб бошлиғи Жавлон Пўлатовнинг таъкидлашича, кейинги йиллардан спорт секциялари сонини кўпайтириш ва янада кўпроқ ўқувчи-ёшларни жалб этиш мақсадида велоспорт ва картинг турларини очишни мўлжал қилишган. Демак, Ўртачирчиқ туманида спортнинг техник ва амалий турлари янаям ривожланади.    

Илҳом РАҲМОНОВ тайёрлади, ўз мухбиримиз