Осиё чемпионати. Боксчиларимизнинг овқатланиш жойи, вазн назорати ва Лебзяк

Етиб борганимизда боксчиларимиз бир неча дақиқа аввал машғулотларни якунлаган, терма жамоа бош мураббийи Марат Қурбонов спортчиларимиз вазнларини назоратдан ўтказаётган экан. Мусобақа бошлангунга қадар барча вазн меъёрини бажариши лозим-да. Бунинг тўғри амалга оширилиши терма жамоамиз устозининг доимий назоратида.

Бундан ташқари кеча боксчилар учун мандат ўтказилди. Унда спортчиларнинг ҳужжатлари, давомати текширилди. Ушбу текширув ҳам терма жамоамиз вакиллари учун кўнгилдагидек кечди. Барча ҳужжатлар жой-жойида, ташкилий томондан муаммолар йўқ. 

Ташриф давомида бир неча спортчиларимиз билан суҳбатлашиб, қисқа интервьюлар олишга муваффақ бўлдим. Кўриниб турибди, боксчиларимиз мусобақага тайёргарликни жуда яхши олиб бормоқдалар. Барчанинг кайфияти яхши.

Видеони томоша қилинг:

Шундан сўнг спортчиларнинг овқатланиш жойини кўрдик. Осиё чемпионатида иштирок этувчи делегация вакиллари айнан шу ерда уч маҳал овқатланадилар.

У ерда россиялик машҳур мураббий Александр Лебзякка кўзим тушди. Таниб қолиб дарҳол суратга ола бошладим. Шунда у буни сезиб қолди ва "оо, паппараци" деганича ўзбекистонлик мутахассислар билан бироз суҳбатлашди, якунда эсдалик учун суратга ҳам тушди. Ҳозирда таниқли мутахассис Хитой терма жамоаси устози сифатида фаолият олиб бормоқда.

Айни шу меҳмонхонанинг ўзида рўйхатдан ўтиб, мусобақа давомида ишлаш ҳуқуқини берувчи аккредитацияларни ҳам олдик. Бугун насиб қилса, маҳаллий вақт билан соат 11:00 да (Тошкентда 09:00) терма жамоа машғулотига борамиз. Ва албатта эксклюзив суратлар ҳам бўлади :) Соат 16:30 да эса қуръа ташлаш маросими бўлади.

Олимпия ўйинлари совриндори, терма жамоамиз мураббийи Рустам Саидов ва унинг тожикистонлик мухлиси

Мураббий Раҳматжон Рўзиохунов бош котиб Муроджон Мамадалиевга ташкилий масалалар ҳақида сўзлаб бермоқда

Терма жамоамиз бош мураббийи Марат Қурбонов

Бангкок кўчаларда ана шундай автомобиллардан такси сифатида фойдаланиш мумкин.

Азиз Тўхтамуродов, Бангкок.