Осиё чемпионати. Сапарниязов бронза учун курашади, Шапиев 1/2 финалда

Бугун эркин кураш баҳсларининг иккинчи куни ҳам 5 та вазн тоифасида ғолиб ва совриндорлар номи маълум бўлади. -92 кг вазн тоифасида юртимиз шарафини ҳимоя қилаётган Ажинияз Сапарниязов чорак финалда ҳиндистонлик Сомвир Сомвирни 10:0 ҳисобида енгди. Ярим финалда эса эронлик Муҳаммаджавад Иброҳимизивайига 2:10 ҳисобида ютқазиб қўйди. Энди Ажинияз кечки дастурда қозоғистонлик Илисхан Чилаевга қарши бронза медали учун гиламга чиқади. 

-86 кг вазн тоифасидаги курашчимиз Иса Шапиев чорак финалда тожикистонлик Баҳодур Қодировни 7:4 ҳисобида енгди. Бироздан сўнг у финал чиптаси учун эронлик Аҳмад Юсуф Базриғалеҳга қарши баҳс олиб боради. 

-61 кг вазнда баҳсларга киришган Жаҳонгирмирзо Туробов саудиялик Рами Аламадан 12:2 ҳисобида устун келди. Аммо, чорак финалда Раҳул Аварега 9:1 ҳисобида ютқазиб қўйди. -74 кг вазндаги Мирзо Ҳайитов илк даврада тожикистонлик Ғуломжон Шариповга 3:10, -125 кг вазндаги полвонимиз Суҳробжон Мукарамов эса ҳиндистонлик Сатендер Сатендерга 4:5 ҳисобида имкониятни бой бериб, Осиё чемпионатидаги иштирокини якунлади.