Осиё каратэ федерацияси президенти Ислом цивилизация марказида бўлди

Бугун Осиё каратэ федерациясининг янги президенти Генерал Носир Абдулраззоқ Ўзбекистон каратэ Миллий федерацияси раиси, Осиё каратэ федерацияси биринчи вице-президенти ҳамда Ижроқўм аъзоси Аламжон Муллаев ҳамроҳлигида нафақат юртимиз, балки кўпчилик хорижий мамлакатлар халқларининг ҳам тили ва дилидан жой олишга улгурган Ўзбекистондаги Ислом цивилизацияси марказида бўлишди. 

Меҳмонлар Ҳазрати Имом (Хастимом) мажмуасида бунёд этилаётган тарихий марказ биноси билан танишар эканлар, ўзлари учун бой маънавий озуқа олдилар.

Маълумот учун, Марказ учун 9,1 гектар майдон ажратилган бўлиб, бино миллий анъанавий усулда қурилмоқда. Ушбу ҳудудга кираверишда кўзингиз дастлаб “Бу ерда тарих яратилмоқда”, деган ёзувга тушади. Дарҳақиқат, бу ерда узоқ кутилган тарихий маскан қад ростламоқда. Марказ биносининг 2020 йил кузда фойдаланишга топширилиши режалаштирилмоқда. 

Ўзбекистон каратэ Миллий федерацияси матбуот хизмати