Осиё каратэ федерацияси раҳбари МОҚ президентига ташаккурнома жўнатди

Қитъамизнинг энг кучли каратэ усталари иштирокида кечган беллашувлар спортчиларга унутилмас онларни тақдим этди.

Юқори савияда ташкил этилган мусобақа халқаро федерация мутасаддиларининг ҳам эътибор марказида бўлди. Бунга жавобан Осиё каратэ федерациясининг (ОКФ) раиси генерал-майор Носир Ал-Раззоқи Миллий олимпия қўмитаси президенти Рустам Шоабдураҳмоновга ташаккурнома йўллади.

“Ушбу мактубни катталар ўртасидаги каратэ бўйича 16-Осиё чемпионати муваффақиятли якунлагани билан Сизни ва Ўзбекистон Миллий олимпия қўмитасини табриклаш учун йўллаяпман. Осиё каратэ федерацияси номидан чемпионат ўтказилишини қўллаб-қувватлаганингиз учун Сизга ва Миллий олимпия қўмитасига миннатдорчилик билдириб қоламан. Сўзим сўнгида Сиз ва Миллий олимпия қўмитасига жорий йил муваффақиятли ва омадли ўтишини тилаб қоламан”, – дейди Носир Ал-Раззоқи ўз мактубида.

Эслатиб ўтамиз, мазкур Осиё чемпионати беллашувлари бошланишидан аввал ОКФ Конгресси ўтказилган ва унинг доирасида Носир Ал-Раззоқи ОКФнинг янги раҳбари этиб сайланган эди. Каратэчиларимиз эса мусобақа давомида 3 та олтин, 1 та кумуш ва 3 та бронза медалларини жамрағишди.