Осиё оммавий ахборот воситалари янги мусобақаларни ёритишга тайёрланмоқда

“Икки йил давомида олдимизда масъулиятли вазифалар турибди. Биз бутун Осиё ва бутун жаҳондаги минглаб оммавий ахборот воситалари вакилларини ООКнинг тадбирларида кутамиз, – деди ОAВ қўмитасининг раиси Чарльз Ло. – Жумладан, 2021 йилнинг апрелида Хитойнинг Санье шаҳрида олтинчи Осиё соҳил ўйинлари, майда Бангкок ва Чонбури провинциясида Жанг санъати ва ёпиқ иншоотларда олтинчи Осиё ўйинлари, ноябрь ойида Хитойнинг Шаньтоу шаҳрида учинчи ўсмирлар Осиё ўйинлари бўлиб ўтади. Ушбу учта минтақавий мусобақалар 2022 йил сентябрида Хитойнинг Ханчжоу шаҳрида бўлиб ўтадиган XIX Осиё ўйинларини муваффақиятли ўтказиш учун асос бўлади”.

Масъул ходимлар бўлажак ўйинларга матбуот материаллари ва телекўрсатувларга тайёргарлик, IT ишланмалари, ООКнинг янгиланган веб-сайти ва ундаги янгиликлар билан танишдилар.

Оммавий ахборот воситалари бўйича қўмита аъзоси япониялик Хироши Такеучи журналистларнинг Миллий олимпия қўмиталари орқали аккредитация қилиниши муҳим эканлигини алоҳида таъкидлади.

– Бизнинг мақсадимиз оммавий ахборот воситалари узлуксиз ва самарали ишлаши учун энг яхши шарт-шароитлар яратиб беришдан иборат, – деб таъкидлади Чарльз Ло.