Осиё ўйинлари-2018. 38та медал билан 9-ўриндамиз, хисобимизда 9та олтин!

Бугун мусобақанинг ўн биринчи кунги баҳслари давом этмоқда ва айни пайтга келиб медал жамғариш бўйича Ўзбекистон терма жамоаси жами 38та медал билан умумжамоа ҳисобида 9-ўринни эгаллаб турибди. Ҳисобимизда 9та олтин, 15та кумуш, 14та бронза медали бор.

Биз каби 9та олтин медалга эга Ҳиндистон терма жамоасида кумуш медаллар сони кўпроқ - 19та. Қозоғистон терма жамоаси 8та олтин, 9та кумуш, 30та бронза, жами 47та медалга эга бўлиб турибди. Ён қўшниларимиз умумжамоа ҳисобида 11-поғонадан жой олишган. 

Шу сонияларга қадар жами 212та медални қўлга киритиб улгурган Хитой терма жамоаси катта фарқ билан медаллар жамғариш бўйича биринчи ўринни эгаллаб турибди. Чин юрти вакиллари бир кам 100та олтин, 65та кумуш, 48та бронза медали билан тақдирланишган. 

Кучли учликда Япония ва Жанубий Корея терма жамоалари жойлашишган. Ўттиз олтита давлат спортчиларига камида битта медал олиш насиб қилган. Йигирма тўққизта мамлакат терма жамоалари ҳисобида эса камида бир нафар Осиё ўйинлари-2018 чемпиони бор.