Осиё ўйинлари. Тўрабек Ҳабибуллаев учун ҳақиқий синов, Баҳодир Жалолов ва бошқа жаҳон чемпионларимиз ҳам Олимпиада илинжида. Бокс терма жамоамиз таркиби қанчалик мукаммал?

Узоқ кутилган бу сафарги Осиё ўйинларига мамлакатимиз тарихидаги энг катта делегация жўнаб кетиши айтилган. Аммо барибир, ўзбекистонлик мухлислар бокс терма жамоамиздан кўп нарса кутиши сир эмас. Бунинг сабаби ҳам бор: мазкур Осиё ўйинларида Париж-2024 Олимпиадаси лицензиялари ҳам ўйналади.

Кеча Ўзбекистон бокс федерацияси матбуот хизмати спорт федерацияларимиз орасида биринчилардан бўлиб Осиё ўйинларида иштирок этувчи таркибимизни эълон қилди.

-51 кг: Ҳасанбой Дўсматов

-57 кг: Абдумалик Халоков

-63,5 кг: Руслан Абдуллаев

-71 кг: Асадхўжа Мўйдинхўжаев

-80 кг: Тўрабек Хабибуллаев

-92 кг: Лазизбек Мулложонов

+92 кг: Баҳодир Жалолов

Таркиб, кутилганидек, оптимал экани ойдинлашди. Фақатгина -80 кг вазндаги Тўрабек Ҳабибуллаев кўпчилик мухлислар учун кутилмаган қарордек туюлди. Сабаби, бу вазнда жаҳон чемпионатида термамиз шарафини Жасурбек Йўлдошев ҳимоя қилди. Лекин мураббийлар штабини тўғри тушуниш мумкин: Йўлдошев ЖЧда ўзига берилган имкондан деярли фойдалана олмади. У ЖЧдаги юришини биринчи бўлиб тўхтатган боксчимиз бўлди (1/16 финал).

Шахсий фикримча, -75 кг вазн тоифасида жаҳон чемпионатида максимал натижани қайд эта олган Аълохон Абдуллаев ҳам бу вазнда ўзини кўрсатиши мумкин эди. У терма жамоамизнинг жаҳон чемпионатидаги энг ёш аъзоси (2003 йил) сифатида бронза медалини қўлга кирита олган эди.

Шунингдек, - 80 кг вазн тоифасида Тўлқин Қиличевда Одилжон Аслонов ва Дилшод Рўзметов вариантлари ҳам бор эди. Лекин мураббийлар штаби Тўрабек Ҳабибуллаевга имкон беришга қарор қилди.

Бу вазиятда мураббийлар қарорини оқлаш мумкин. Чунки бу вазндаги деярли ҳар бир боксчига етарлича имкон берилди. Тўғри, айни дамда Одилжон Аслонов ҳам яхши формада, аммо юқорида айтилганидек, улар ўз имкониятидан фойдаланишди.

Маълумот учун, Тўрабек Ҳабибуллаев 2022 йилги ёшлар ўртасидаги жаҳон чемпиони ҳисобланади. Бундан ташқари, ёш боксчимиз июль ойида "Елорда Кубоги"ни бронза медали билан якунлади, Жасурбек Йўлдошев эса ўша мусобақада кумуш медалга эга чиқган эди. Манбамизнинг маълум қилишича, у федерацияда ташкил этилган кичик халқаро турнирда, бир қатор спаррингларда ўзини яхши кўрсатган.

-51 кг вазн тоифасида эса ўз вазнининг эгаси,  "профессор" Ҳасанбой Дўсматов мусобақага йўл олмоқда. У жаҳон чемпионатидаги сингари бу сафар ҳам қийинчиликсиз ғолибликни қўлга киритиши эҳтимоли юқори.

Шунингдек, Тошкентдаги жаҳон чемпионатида олтин медални қўлга киритган Абдумалик Халоков, Руслан Абдуллаев, Асадхўжа Мўйдинхўжаев ҳамда Баҳодир Жалолов ҳам таркибдан жой олди, бунга шубҳа бўлмаса-да. Бронза медалини қўлга киритган Лазизбек Мулложонов ҳам ўзи учун янги бўлган вазнга тўла мослашди ва энди у Олимпиада йўлида айнан шу вазнда рингга чиқади.

Яна бир қўшимча маълумот сифатида айтиш жоизки, Баҳодир Жалолов бу йил ўзининг илк Осиё ўйинлари мусобақасида рингга чиқади.

Умуман олганда, Ўзбекистон бокс терма жамоаси Осиё ўйинлари учун идеал таркибда йўл олмоқда. Айнан шу мусобақа терма жамоада -80 кг вазннинг янги эгасини аниқлаб бериши мумкин.

Муаллиф - Диёрбек Мавлонов/olamsport.com