Осиё вице-чемпионлари тантанали кутиб олинди

Ҳозирда синхрон сузувчиларимиз қитъа биринчилиги медаллари учун курашишда давом этаётган бўлса, кеча кечқурун сув полоси бўйича Ўзбекистон ўсмирлар ва қизлар терма жамоалари юртимизга қайтиб келишди.

Эътиборли жиҳати, айнан қизлар термаси Осиё чемпионатида кумуш медалга сазовор бўлди ва натижада улар келгуси йил Исроил давлатида бўлиб ўтадиган жаҳон чемпионатида қатнашиш ҳуқуқини қўлга киритди.

Сув полоси бўйича қизлар ўртасидаги Осиё чемпионатида сариқ қитъанинг 6та терма жамоаси иштирок этди. Ўйинлар давравий тизимда ўтказилиб, барча учрашувларда ғалабага эришган Япония терма жамоаси 10 очко билан қитъа чемпионига айланди. Қозоғистон ва Ўзбекистон қизлар терма жамоалари эса бир хил – учтадан ўйинда зафар қучишди. Фақат, ўзаро ўйиндаги анчайин ишончли – 16:11 ҳисобидаги ғалаба якунда қизларимизга кумуш медални тақдим этди.

Суратлар муаллифи - Алимурод Мамадаминов