Ўсмирлар Олимпиадаси совриндори анъанага кўра МОҚнинг эсдалик совғаси билан тақдирланди

Унинг медали Ўзбекистон терма жамоаси учун Буэнос-Айресдаги мусобақада дастлабкиси бўлди. Тақдирлаш маросимидан сўнг Олимпия шаҳарчасида ўзига хос кичик йиғилиш ташкил қилинди. Миллий олимпия қўмитаси вакиллари ғолиб спортчи ва унинг мураббийини табриклашди. 

Ушбу тадбирда Миллий олимпия қўмитаси Бош котиби Жасур Матчанов ҳам иштирок этди.

«Олтин медаль учун бироз омад етишмади. Аммо мусобақанинг биринчи кунидаёқ медаль қўлга кирита олганимиздан хурсандмиз. Умид қиламизки, бундан кейин медалларимиз сони янада кўпаяди ва юқори натижалар билан Ўзбекистон халқини хурсанд қиламиз», – деди Бош котиб.

Шундан сўнг Жасур Матчанов анъанага кўра спортчимизга Ўзбекистон Миллий олимпия қўмитаси логотипи туширилган махсус эксклюзив соатни эсдалик совғаси сифатида тақдим этди.

Сўнгра ишчи гуруҳ йиғилиши бўлиб ўтди ва унда ташкилий масалалар, олдинда кутилаётган мусобақалар, бажариладиган топшириқлар муҳокама қилинди.