Отабек Умаров стол тенниси федерациясига ташриф буюрди

Кеча мутасаддилар Ўзбекистон стол тенниси федерациясининг бу борадаги тақдимотини таҳлил қилишди.

Стол теннисчиларимиз шу пайтгача Афина-2004 ва Рио-2016 ёзги Олимпия ўйинларида иштирок этишган. Учрашувда Лос-Анжелес-2028 ёзги Олимпия ўйинларига ҳам эркаклар, ҳам аёллар терма жамоамиз вакилларининг йўлланма олишлари кераклиги, бунинг учун барча шароитлар яратиб берилиши маълум қилинди.

Федерация масъуллари ушбу спортда қитъа ва жаҳон миқёсида рақобатнинг кучли эканидан келиб чиққан ҳолда Олимпиада лицензиялари минтақавий саралаш турнири орқали қўлга киритилиши кўзда тутилганини таъкидлашди. МОҚ расмийлари спортчиларимизнинг жаҳон рейтингидаги ўринларини кучайтириш, мунтазам нуфузли мусобақалардаги иштирокларини таъминлаш бўйича ўз тавсияларини бердилар.

Қолаверса, учрашувда стол теннисини мамлакатимизда янада оммалаштириш борасида белгиланган режалар ҳақида ҳам сўз борди. Суҳбат давомида қизларимизнинг ўз ёш тоифаларида жаҳон чемпионатларида иштирок этиб келишаётганидан келиб чиққан ҳолда уларнинг салоҳиятини янада ошириш мақсадида кўпроқ хорижий ўқув-машғулот йиғинларини ташкил этиш бўйича таклифлар билдирилди.