Ўтказилишига 9 кун қолган UFC 311 турнири бекор қилиниши мумкин

Океан ортидан келаётган сўнгги маълумотларга қараганда, UFC 311 турнири ўтказилмаслиги ёки бошқа манзилга кўчирилиши мумкин экан. Бунга тўрт кундан бери давом этаётган ўрмон ёнғинлари сабаб бўлмоқда. Ҳозиргача табиий офат 5 кишининг ҳаётига зомин бўлгани айтиляпти. Тилсиз ёв 10 минг гектар майдонни қамраб олган, минглаб одамлар хавфсиз жойларга эвакуация қилинган. 

Мингдан ортиқ маъмурий ҳамда аҳолий яшаш уйлари ёниб кул бўлган. Миллиондан зиёд киши электр энергиядан узилиб қолган. Ёнғин ўчириш учун ишчи кучи, техника етишмаяпти. Шу боис ёрдамга авиация ҳам жалб қилинган. АҚШнинг амалдаги президенти Жо Байден Италияга расмий сафарини бекор қилиб, фавқулодда вазият режимини жорий этган. 

Машҳур кино, санъат, мусиқа ва телевидения юлдузлари истиқомат қилувчи Санта-Моника ва Малибу соҳиллари оралиғидаги Пасифик-Палисейдс тумани энг кўп зарар кўрган ҳудудлардан бири бўлиб турибди. Лос-Анжелесдаги ёнғин АҚШ тарихидаги энг каттаси бўлиши мумкин. Ҳозиргача бўлган ҳисоб-китобларга таянадиган бўлсак, етказилган зарар 57 миллиард долларга баҳоланяпти.