12 июн 12:07
Янгиликлар

Бокс/ММА, Болалар спорти

Ўзбек бокси юлдузлари ёш спортчилар мактабида меҳмон бўлишди

Теглар : Бокс

XXXI ёзги Олимпия ўйинлари совриндорлари Шаҳрам Ғиёсов ва Муроджон Аҳмадалиев, шунингдек, бокс бўйича жаҳон кубоги ғолиби, Осиё ўйинлари совриндори Исроил Мадримовлар Тошкент шаҳар Бектемир туманидаги 1-сонли БЎСМга ташриф буюришди.

Туман ҳокимлигининг Маънавият тарғибот бўлими ташаббуси билан ташкил этилган тадбирда Болалар ўсмирлар спорт мактабида камол топаётган икки юздан зиёд ёш спортчилар иштирок этишди.

Бугунги кунда 1-сонли БЎСМда спортнинг 14 та тури бўйича машғулотлар олиб борилмоқда ва ушбу ўқув-спорт масканида таҳсил олаётган 772 нафар ёшлар спортнинг футбол, бокс, эркин кураш, дзюдо, бадиий гимнастика, теннис, стол тенниси, гандбол, таэквондо (WTF), ўзбек жанг санъати, баскетбол, велоспорт, миллий кураш ва самбо турлари билан шуғулланиб келишмоқда.

Яқиндагина пойтахтимизда бўлиб ўтган бокс бўйича Осиё чемпионатида бутун дунёни ҳайратга солиб 10 та вазн тоифасининг тўққизтасида олтин медалларга сазовор бўлган Ўзбекистон терма жамоаси аъзоларининг спорт мактабига ташрифи болажонларга чексиз қувонч ва шодлик улашди.

Ўз навбатида Шаҳрам Ғиёсов, Муроджон Аҳмадалиев ва Исроил Мадримовлар йиғилганларга ўзларининг спортдаги илк қадамлари, биринчи устозлари, болалик хотиралари хақида сўзлаб беришди. Шунингдек, Олимп шоҳсупасига қадар босиб ўтилган машаққатли йўл, тинимсиз машғулотлар, ўқув-йиғинлари, нуфузли мусобақалардаги иштирок хақидаги суҳбатлар ёш спортчиларда катта қизиқиш уйғотди.

Тадбир давомида 1-сонли БЎСМ тарбияланувчилари бокс, бадиий гимнастика, кураш, дзюдо бўйича кўргазмали чиқишлар қилиб, меҳмонларга ўз маҳоратларини намойиш этишди. Суҳбат тарзида ўтказилган мазкур тадбир давомида профессионал спортчилар келажак авлод вакилларини қизиқтирган барча саволларга жавоб беришди.

Тадбир сўнггида бокс юлдузлари болажонлар ва уларнинг устозлари билан билан эсдалик учун суратга тушиб, дастхатлар қўйиб беришди. Бу учрашув ёш спортчилар қалбида бир умрга муҳрланиб қолиши шубҳасиз.

Ҳавола :

Манба : olympic.uz

Рейтинг: