Ўзбек брендини реклама қилаётган қозоқ жангчиси UFC 257 турнирида октагонга чиқади

Оқшом доирасидаги жангларнинг бири қозоғистолик енгил вазн тоифаси вакили Жалгас Жумагулов иштирокида ўтказилади. Жалгас Амир Албазига қарши октагонга кўтарилади. Аслида бу жанг UFC on ESPN 18 турнирида ўтказилиши керак эди. Лекин Жумагуловнинг паспорти билан боғлиқ муаммо сабаб жанг кечроқ муддатга кўчирилган эди. АҚШ элчихонаси ўз вақтида қозоғистонлик жангчининг паспортини қайтармагани учун Жалгас Лас-Вегасга уча олмаганди. 

Маълумот учун, Ўзбекистон бренди - Buka либосларида кўриниш бераётган 32 ёшли Жумагулов шу йил июль ойида UFC`да омадсиз дебют қилган ва Раулиана Пэйвага имкониятни бой бериб қўйган эди. Унгача у FNG промоушенида 4 та ғалаба қайд этганди. Жалгас Тагир Уланбеков ва Али Багаутиновни мағлуб этиб, UFC`дагиларнинг эътиборини ўзига тортганди.