Ўзбек жанг санъати бўйича Ўзбекистон чемпионати ўтказилди ФОТОГАЛЕРЕЯ

Чемпионатда Қорақалпоғистон Республикаси, вилоятлар ва Тошкент шаҳридан минг нафардан зиёд спортчилар иштирок этди ва улар “Комплекс машқ”, “Темурийлар жанг усули”, “Жамоавий кўргазмали чиқиш”, “Жамоавий ассалом тонг” йўналишлари бўйича ўзаро беллашдилар.

Мусобақа Ўзбекистон Республикаси Миллий гвардияси ҳамда Ўзбекистон  Республикаси соғлиқни сақлаш вазирлиги билан ҳамкорликда ташкил этилди. Чемпионатни ўтказишдан кўзланган мақсад ўсиб келаётган ёш авлодни ватанпарварлик, юртига содиқ, жисмонан соғлом ва маънан баркамол фарзандлар қилиб тарбиялашдан иборат. 

Ғолиб ва совриндорлар миллий терма жамоа таркибига қабул қилинди. Турнирда илк бор ИИВ академияси ва Наманган вилояти мактабгача таълим муассасаси вакиллари иштирок этдилар.

"Жамоавий кўргазмали чиқиш” ва “Жамоавий ассалом тонг” йўналиши бўйича Тошкент вилояти жамоаси 1-ўринни қўга киритди. Умумжамоа ҳисобида эса Андижон вилояти жамоаси биринчи ўринни эгаллади. Пойтахт вилояти вакиллари иккинчи поғонани банд этишган бўлса, кучли учликка Тошкент шаҳри жамоаси якун ясади.