Ўзбекча трансфер: Сергеев "Пахтакор"га неча миллион доллар фойда келтирган?

Хабарингиз бор, олдинги сафар ҳамюртимиз Одил Аҳмедов иштирокида имзоланган ўтиш битимлари ҳақида маълумот бергандик. Наманганлик футболчи 2011 йилнинг ёзида "Анжи"га ўтаётган маҳалда "шерлар" ҳисоб рақами 1,7 млн еврога бойиган.

"Пахтакор"нинг Аҳмедовдан кейинги йирик трансфери 2018 йилнинг қишида содир бўлди. Ўшанда Игор Сергеев "Ал Дафра" таркибига қўшилган, БАА клуби ҳужумчи учун 1,5 млн евро тўлаган эди. Аммо, Игорнинг Бирлашган Араб Амирликлари суперлигасида ишлари юришмади ва ўша йилнинг ёзида эркин агент сифатида Тошкент жамоасига қайтди. Бундан ташқари, "Пахтакор" Сергеевни 2016 йилги мавсумнинг 2-қисмида "Бэйцзин Гоань"га ижарага берган ва 6 ойлик шартнома учун 500 минг евро ишлаб олган. Хуллас, футболчи ўзини тарбиялаган клубга умумий ҳисобда 2 млн евро фойда келтирган.

Жорий йилнинг февраль ойида Игор фаолиятида 3-бор легионерга айланиб, Қозоғистоннинг "Актобе" жамоаси таркибига эркин агент сифатида бориб қўшилди. Сергеев янги клуби сафида аллақачон 14 ўйинда 7 та гол уришга улгурган. "Пахтакор" спорт директори Жафар Ирисметовнинг Championat.asia'га маълум қилишича, айни пайтда 28 ёшли ҳужумчини жамоага қайтариш бўйича музокара ўтказилмоқда. Игор катта эҳтимол билан янги мавсумни "шерлар" сафида бошласа керак.