Ўзбекистон 2027 йилги Жаҳон кубоклари учун иккита йўлланмага эга бўлди!

Ўзбекистон ҳар иккала мусобақада биттадан йўлланмага эга!

Очиқ йўналиш — 1 та йўлланма

Самарқандда Олимпиада чемпионига айланган Ўзбекистон терма жамоаси Жаҳон кубоги йўлланмалари рўйхатида биринчи ўринни эгаллади.

Ушбу йўлланма учун Олимпиадада чемпион бўлган таркибдаги шахматчилардан бири танланиши мумкин:

Нодирбек Абдусатторов, Жавоҳир Синдаров, Нодирбек Якуббаев, Шамсиддин Воҳидов ёки Муҳиддин Мадаминов.

Аёллар йўналиши — 1 та йўлланма

Олимпиадани 13-ўринда якунлаган Ўзбекистон аёллар терма жамоаси ҳам 2027-йилги Жаҳон кубогида қатнашиш ҳуқуқини қўлга киритди.

Йўлланмага номзодлар — Афруза Ҳамдамова, Гулруҳбегим Тоҳиржонова, Умида Омонова, Нилуфархон Имомқўзиева ва Гулдона Каримова.

Йўлланмалар кимларга берилади?

FIDE қоидаларига кўра, ҳар бир миллий федерация Олимпиадада қатнашган жамоаси аъзоларидан бирини танлайди. Агар барча аъзолар бошқа йўл билан сараланган ёки иштирок этишдан бош тортган бўлса, федерация бошқа шахматчини ҳам кўрсатиши мумкин.

Якуний вакиллар 2027 йилнинг 1-15 июль кунлари тасдиқланиши кутилмоқда.

Умумий ҳисобда Олимпиада натижалари орқали очиқ йўналишда 83 та, аёллар йўналишида эса 45 та миллий федерация Жаҳон кубоги йўлланмасига эга бўлди.

Самарқанддаги Олимпиада Ўзбекистон шахматчиларига нафақат медаллар, балки келгуси йилдаги энг нуфузли халқаро мусобақалардан бирида қатнашиш учун янги имкониятлар ҳам тақдим этди.

Сизнингча, Ўзбекистоннинг ушбу икки йўлланмаси кимларга берилиши керак?