Ўзбекистон 3-ўринга кўтарилиб олган Олимпиаданинг 7-турида асосий рақибларимиз қандай натижа қайд этишди? (ФОТО+ЖАДВАЛ)

Амалдаги Олимпиада чемпиони ҳисобланган Ўзбекистон эркаклар терма жамоаси 7-турда украиналик шахматчилардан 3:1 ҳисобида устун келишди. Ёш гроссмейстерларимиз 45-Бутунжаҳон шахмат Олимпиадасининг бугун ўтказиладиган 8-турида таркибида тажрибали шахматчилар жам бўлган Сербия терма жамоасига қарши дона суришади.  

Саккизинчи тур олдидан 100 фоизлик натижа қайд этган биргина Ҳиндистон бўлиб турибди. Ҳиндлар 7 та учрашувниг барчасида ғалаба қозонишган. Эрон ва Грузия ҳам ҳали мағлубиятга учрамаган. Форслар 6 ғалаба ва 1 дуранг қайд этишган. Грузинлар 4 ғалаба ва 3 дурангга эга. Ўзбекистон, Венгрия, Арманистон ва бугунги рақибимиз Сербия терма жамоаси 6 ғалаба ва 1 мағлубиятга эга. АҚШ, Хитой ва Вьетнам терма жамоалари ҳисобида 5 ғалаба, 1 дуранг ва 1 мағлубият бор. 

Ўзбекистон қўшимча кўрсаткичларга кўра 12 очко жамғарганлар орасида энг юқори - 3-ўринни эгаллаб турибди. Пешқадам Ҳиндистон 12, иккинчи ўриндаги Эрон 13 очкога эга. Венгрия, Арманистон, Сербия ҳисобида ҳам биз сингари 12 очкодан бор.   

Терма жамоамизнинг асосий рақиблари 7-турда муҳим ғалабаларга эришишди. Ҳиндистон марказий учрашувда Хитойни 2,5:1,5 ҳисобида енгди. Эрон худди шу ҳисобда Вьетнамдан устун келди. Венгрия ҳам шу ҳисоб билан Литва шахматчиларидан устун келди. Ўзбекистон Украинани, Сербия Нидерландияни 3:1 ҳисобида мағлубиятга учратди. Арманистон - Англия - 2,5:1,5. 

Бугун ўтказиладиган 8-турнинг марказий баҳси Ҳиндистон ва Эрон терма жамоалари ўртасида ташкил этилади. Ушбу учрашувда рақибларимиздан бири, балки иккиси ҳам очко йўқотар. Биз эса ўз ўрнида Сербияни таслим этсак, пешқадамга айланишимиз мумкин. 

8-турнинг марказий учрашувлари:

Эрон - Ҳиндистон

Венгрия - Арманистон

Сербия - ЎЗБЕКИСТОН 

АҚШ - Франция

Хитой - Руминия

Вьетнам - Норвегия

Грузия - Нидерландия