Ўзбекистон бокс федерацияси томонидан ташкил этилган "Энг яхши онлайн мураббий" танлови ғолиби тақдирланди

Ушбу танловимизда кўплаб профессионал ва ҳаваскор мураббийлар ўз омадларини синаб кўришди. Табиийки танлов учун келиб тушган видеолар ичидан ғолибни аниқлаб олиш Ўзбекистон бокс федерацияси танлов комиссияси учун осон бўлмади. Узоқ муҳокамалардан сўнг Тошкент вилояти Бўстонлиқ туманидаги спорт мактабида фаолият олиб бораётган Отабек Қосимов биринчи ўринни эгаллади. 

Бугун Ўзбекистон бокс федерацияси биносида мураббийни тақдирлаш маросими ўтказилди. Унда Ўзбекистон бокс федерацияси раҳбарияти ҳам қатнашиб, мураббийни эришилган ютуқ билан табриклади. Бундай танловлар боксни янада оммалаштириш учун ўз ҳиссасини қўшиши алоҳида таъкидланди. Танловимиз ғолибига пул мукофоти ва сертификат тақдим этилди.

"Тўғрисини айтсам, танловда ғолиб чиқишимни кутмагандим. Бир неча кун олдин мен билан алоқага чиқиб, ушбу конкурс ғолиби бўлганимни айтишди. Танловда кўплаб мураббийлар қатнашишди. Омад мен томон кулиб боқди ва якунда биринчи ўрин менга насиб этди. Фурсатдан фойдаланиб, танлов ташкилотчиларига ўз миннатдорчилигимни билдириб ўтаман", - деди Отабек Қосимов. 

Ўзбекистон бокс федерацияси матбуот хизмати