Ўзбекистон делегацияси Японияда антидопинг тажрибасини ўрганмоқда

Ишчи гуруҳ вакиллари Япониянинг антидопинг соҳасидаги етакчи ташкилоти – Japan Anti-Doping Agency (JADA) раҳбарияти билан учрашув ўтказди. Унда допингга қарши курашиш бўйича миллий сиёсатни шакллантириш, давлат қўллаб-қувватловини таъминлаш, жисмоний тарбия ва спорт тизимини ҳалоллик принциплари асосида ривожлантириш борасидаги япон тажрибаси билан яқиндан танишилди.

Шунингдек, Япониялик мутахассислар томонидан махсус семинар ташкил этилди. Семинар давомида халқаро допингга қарши кураш тизимининг асосий ташкилоти – The World Anti-Doping Agency (WADA) Токио лабораторияси фаолияти, унинг ҳуқуқий мақоми, моддий-техника базаси, илмий тадқиқот ва таҳлил жараёнлари ҳамда спортчилардан намуналар олиш ва уларни халқаро стандартлар асосида таҳлил қилиш услублари батафсил таништирилди.

Учрашув ва семинарлар доирасида томонлар ўртасида қуйидаги масалалар муҳокама қилинди:

• Антидопинг соҳасидаги давлат сиёсатини такомиллаштириш

• Спортда ҳалолликни таъминлашда қонунчиликнинг ўрни ва амалиёти

• Осиё минтақасидаги энг самарали антидопинг тажрибаларини Ўзбекистон амалиётига жорий этиш имкониятлари

• Ёшлар орасида допингдан холи спортни кенг тарғиб қилиш йўллари

Таъкидлаш лозимки, ушбу ташриф доирасида олинган амалий тажриба ва илғор ёндашувлар мамлакатимизда антидопинг тизимини халқаро стандартлар асосида ривожлантириш, спортчиларимиз учун ҳалол ва соғлом рақобат муҳитини яратиш, шунингдек, Ўзбекистоннинг халқаро спорт майдонидаги нуфузини янада юксалтиришга хизмат қилади.