Ўзбекистон делегациясининг ўз тарихидаги энг катта таркиб билан қатнашадиган қишки Осиё ўйинларига тайёргарлиги ОАВ нигоҳида

Миллий Олимпия қўмитасида Ўзбекистон делегациясининг ушбу мусобақадаги иштирокига бағишланган матбуот анжумани ташкил этилди. 

Унда Спорт вазирининг ўринбосари Шаҳрулло Маҳмудов, МОҚ раисининг ўринбосари, Ўзбекистон делегациясисининг мусобақадаги миссия раҳбари Шерзод Ташматов ОАВ вакилларининг саволларига жавоб беришди.

Тадбир аввалида Ш.Маҳмудов ҳукуматимиз томонидан терма жамоаларимизнинг бўлажак Ўйинларга тайёргарлиги тўла қўллаб-қувватлангани, мусобақа орқали Милан-Кортина-2026 қишки Олимпия ўйинларига йўлланма олиши мумкин бўлган спортчиларимизнинг имкониятлари кўздан кечирилишини таъкидлади. Шунингдек, Ш.Ташматов делегациямиз қатнашадиган спорт турлари, ҳар бир атлетимиз ҳақида батафсил тўхталиб ўтди.

Анжуман давомида ОАВ вакиллари ўзларини қизиқтирган бошқа саволларига атрофлича жавоб олишди.