Ўзбекистон Кубогида "сенсация"! Хоразм вилояти Кубок соҳибига айланди

Мусобақада Қорақалпоғистон Республикаси, вилоятлар ҳамда Тошкент шаҳридан 100 нафарга яқин 2006-2007 йилларда таваллуд топган ўсмир қизлар медаллар учун баҳс олиб боришди. Икки кун давом этган ва 10 та вазн тоифасида ташкил этилган беллашувларда бироз кутилмаган натижа кузатилди.

Хоразм вилояти аёллар кураши жамоаси мамлакатимизда етакчи ҳисобланган Қорақалпоғистон Республикаси ва Навоий вилояти жамоаларини ортда қолдириб, Ўзбекистон Кубоги соҳибига айланди. Қорақалпоғистонлик курашчи қизлар иккинчи ўринни банд этишган бўлса, кучли учликка мезбонлар Навоий вилояти жамоаси якун ясаб берди. 

"Хоразмлик курашчи қизларнинг натижасидан хурсанд бўлдик. Бу рақобат ва ривожланишдан дарак. Ўсмирларимиз жаҳон ва Осиё чемпионатларида муносиб иштирок эта олишларини исботлашди. Бош мураббий сифатида шахсан мен бунга ишонаман", - дейди мамлакат ўсмирлар терма жамоаси бош мураббийи Тўймурод Адизов.

Шунингдек, Ўзбекистон Кубоги доирасида мураббийлар ва ҳакамлар учун семинар ҳам ўтказилди.