Ўзбекистон Кубогининг тантанали очилиш маросимидан ФОТОРЕПОРТАЖ

Бугун мусобақанинг иккинчи куни.

Бироз аввал муросасиз курашлар остида давом этаётган мамлакат кубогининг тантанали очилиш маросими ўтказилди. Тадбирда Хоразм вилояти ҳокимнинг Туризм ва спорт масалалари бўйича ўриносари Ботир Саидов, Урганч шаҳри ҳокими Ойбек Холбоев, вилоят дзюдо федерацияси раиси Ортиқ Полвонов, терма жамоа бош мураббийи Илиас Илиадис ва бошқа мутасаддилар иштирок этдилар.     

"Аввало, Урганч шаҳрига хуш келибсизлар! Уч кун давомида жами 557 нафар дзюдочи 14 та вазн тоифасида медаллар учун кураш олиб боряпти. Беллашувлар муросасиз кечаётганига ҳаммамиз гувоҳ бўлиб турибмиз. Баҳсларни 30 нафар тажрибали ҳакамлар бошқариб боришмоқда. Уларга ҳам раҳмат айтмоқчиман. Барча қатнашчиларга зафар ёр бўлиб, татамида энг кучлилар ғалаба қозонсин", - деди Б.Саидов.  

"Ассалому алайкум, қадрли меҳмонлар, мусобақа иштирокчилари. Азиз юртдошлар! Сизларни шарқ гавҳари ҳисобланмиш қўҳна Хоразм вилояти заминида кўриб турганимиздан беҳад хурсандмиз. Хуш келибсиз, қадамингизга ҳасанот! Аввало, барча устозларимиз, меҳри дарё мураббийларимизни куни кеча юртимизда кенг нишонланган 1 октябрь – Ўқитувчи ва мураббийлар куни билан муборакбод этамиз. Машаққатли ва шу билан бирга шарафли фаолиятингизда янги омад, зафарлар ёр бўлсин!", - деди О.Холбоев. 

Тантанали очилиш маросимида узоқ йиллардан бери мамлакатимиз, хусусан Хоразм вилояти дзюдоси ривожига ҳисса қўшиб келаётган фахрийларимиз - Сабулла Курязов, Комилжон Ибрагимов, Икром Атаев, Маҳмуд Ортиқов, Ҳусинбой Мейлиев эсдалик совғалари билан тақдирланишди. Совғаларни Илиас Илиадис, Рамзиддин Саидов, Рио Олимпиадаси совриндори Диёрбек Ўразбоев, жаҳон чемпионати совриндори Гулноза Матниязова топширди. 

Шунингдек, 1 октябрь – Ўқитувчи ва мураббийлар куни муносабати билан Ўзбекистон дзюдо федерацияси томонидан бир гуруҳ фаол мураббий ва ҳакамларимиз ҳам тақдирланади.