Ўзбекистон MMA уюшмаси раҳбаряти MPL баёнотига расмий муносабат билдирди

Шунингдек, у қарийб 20 нафар ёш курашчилар қатнашиши тахмин қилинган мусобақанинг бекор қилиниши Лигага номаълум сабабларга кўра юз берганини алоҳида таъкидлаб ўтганди. Ўзбекистон ММА уюшмаси ушбу хабарга раддия бериб, ўз расмий муносабатини билдирди. 

"15 декабрь куни, яъни жаноб Алижоновнинг оммавий чиқишидан камида бир ҳафта аввал, MMA уюшмаси томонидан MPL ва ATF раҳбарияти номига ушбу спорт ташкилотлари 6 ойлик муддат давомида ҳар қандай даражадаги мусобақаларни ўтказиш тақиқланганлиги тўғрисида хабардор килинган. Айтиш жоизки, бундай тақиқ учун расмий асослар етарлича ва вазият шаффоф. Чунки турнирларни ўтказиш вақтида MPL ва ATF томонидан Ўзбекистон Республикаси Президентининг 2007 йил 28 мартдаги ПҚ-608-сон қарори ва Вазирлар Маҳкамасининг 2007 йил 16 августдаги 176-сон қарори талаблари тизимли равишда бузилган. Мазкур қарорлар қимор ўйинларини ташкил қилиш билан боғлиқ ноқонуний фаолиятни бартараф этишга қаратилган. Аниқроқ айтадиган бўлсак, кўрсатиб ўтилган лигаларнинг мусобақалари доирасида спортга пул тикиш ҳолатлари фаол реклама орқали илгари сурилишига йўл қўйилган", - дейилади баёнотда.

MMA уюшмаси раҳбаряти ушбу ходисани қуйидагича изоҳлади: “Биз учун MPL раҳбариятининг нима сабабдан бу каби масъулиятсиз хабарларни бераётганини тушуниш қийин. Ўзимиз томондан иккала лигани биз тарафдан жорий этилган чекловлар ҳамда улар билан боғлиқ дастлабки шарт-шароитлар ҳақида ўз вақтида хабардор қилиш учун барча чораларни кўрдик. Қайд этиш керакки, қонунчилик талаблари бир неча марта бузилган, шу боис моҳиятан бизнинг тартибга солувчи сифатида бошқа иложимиз қолмади. Эътиборлиси, ATF томонидан ҳеч қандай эътироз билдирилмаган, зеро Уюшма томонидан иккала ташкилот бир вақтда хабардор килинган. Биз бу ҳолат оммавий тус олишини истамаган эдик, бироқ ҳамкасбларимизнинг тушунарсиз хатти-ҳаракати, афсуски, бизга бошқа йўл қолдирмади. Ўзимиз томондан MMA шаклидаги ҳар қандай тадбирлар мамлакатимизда қонунчиликка қатъий мувофиқликда ўтказилиши учун барча саъй-ҳаракатларни амалга оширамиз”.