Ўзбекистон МОҚ президенти дзюдочилар билан учрашди ФОТОГАЛЕРЕЯ

Хабарингиз бор, Рустам Шоабдураҳмонов Токио-2020 Олимпиадасига муҳим рейтинг очколари ҳамда бевосита лицензия тақдим этувчи турнирларга тайёргарлик кўраётган спортчиларимиз билан учрашиб келмоқда. Ана шундай тадбирлардан бири Ўзбекистон дзюдо федерациясида ўтказилди. 

Дзюдо федерацияси қошидаги шинам спорт залида ўтган самимий руҳдаги учрашувда МОҚ раҳбари терма жамоамиз аъзолари, мураббийлар билан дилдан суҳбатлашди, уларнинг тайёргарлиги, кайфияти билан қизиқди. Қийнаётган муаммо ёки камчиликлар борми, барини суриштирди. 

"Барчамиз учун ўта масъулиятли давр бошланмоқда. Остонада тўрт йилликнинг энг муҳим мусобақаси - Олимпиада турибди. Эртага бугунни қайтариб бўлмайди. Шу боисдан ҳам ҳар бир спортчи шу мен учун берилаётган сўнгги имконият, ё бугун ёки ҳеч қачон деган шиор, талаб билан катта майдонга чиқса, ўйлайманки, ҳаммаси яхши бўлади. Сизларни қандай муаммолар қийнаяпти? Федерация раҳбарияти, Миллий олимпия қўмитаси барча шароитларни муҳайё қилади. Сизлардан фақатгина Олимпиада лицензиясини қўлга киритиш ва бевосита Токиода муносиб тарзда иштирок этиш талаб этилади", - деди Р.Шоабдураҳмонов.

Ўз ўрнида дзюдочилар ҳам давлатимиз томонидан берилаётган эътибор, бу ғамҳўрликка юқори натижалар билан жавоб қайтаришларини, бунинг учун бор имкониятларини ишга солишларини таъкидлашди.

Бир соатга яқин давом этган дўстона руҳдаги учрашув сўнггида Рустам Шоабдураҳмонов йилнинг дастлабки IJF мусобақаси - Тель-Авив Гран-присида юртимиз шарафини ҳимоя қиладиган дзюдочиларга омад тилади.