Ўзбекистон МТЖ 12 ноябрь куни бўладиган ўйинга бир ҳафта олдин йиғилади

Бу ойда иккита ўртоқлик учрашуви ўтказган терма жамоа ноябрда ҳам иккита ўртоқлик ўйинида майдонга тушишни мақсад қилган. ЎФА расмий сайти 28 сентябрь куни чоп этган хабарга кўра, вакилларимизнинг навбатдаги йиғини БААда ташкил этилади. 

ФИФА кунлари 9-17 ноябрга белгиланган. БААда йиғин ўтказадиган Ўзбекистон МТЖ 12 ноябрь Сурия ҳамда 17 ноябрь Ироқ билан куч синашишни режалаштириб қўйган. ФИФА кунлари 9 ноябрдан бошланади дейиляпти, бироқ Вадим Абрамов футболчиларни 6 ноябрдан йиғмоқчи. 

ПФЛ эса 6-7 ноябрь кунлари Ўзбекистон Кубогининг дастлабки учрашувларини ўтказиб олишни мақсад қилганди. Лекин терма жамоа 6 ноябрдан йиғиладиган бўлса, унда Кубок яна кейинга сурилади. 

Айтайлик, Сурия билан ўйин 12 ноябрга белгиланган, лекин футболчиларни бир ҳафта олдин йиғишдан наф бормикан? Дубайга қачон учиб кетилишини билмаймиз, лекин бу ўринда Кубокни ҳам бошлаб олсак чакки бўлмасди. Чунки ФИФА кунлари тугаганидан сўнг буёғига декабрь яқинлашиб қолган бўлади ва чемпионатни қачон якунлаб олиш ҳамда энг муҳими, Кубокни қачон ўтказиш масаласи яна кун тартибига чиқади.

Абрамовнинг футболчиларни анча олдин йиғиши янгилик эмас. Масалан, ўтган йил ўзимизда Саудия Арабистони билан ўйнаганимизда футболчилар 21 кун терма жамоа ихтиёрида бўлишганди. Якунда эса барибир ютқазганмиз.