Ўзбекистон оғир атлетика терма жамоаси ўзининг эронлик мутахассиси билан хайрлашди

Бу ҳақда федерация матбуот хизмати хабар бермоқда:

"Якунланган 2023 йилда Ўзбекистон оғир атлетика федерациясида мураббий маслаҳатчиси лавозимида фаолият юритган Саид Азиз Алиҳусайни терма жамоадаги сўнгги машғулотини ўтказди.

Бугунги машғулотга келган Ёшлар сиёсати ва спорт вазири ўринбосари, Ўзбекистон оғир атлетика федерацияси раиси Шахрилло Маҳмудов эронлик мутахассиснинг мураббийлик маҳорати, билими ва спортдаги тажрибасини яна бир бор эътироф этган ҳолда ўзаро самарали фаолият ва ҳамкорлик учун миннатдорлик билдирди ҳамда унинг келгуси ишларига муваффақият тилади.

Таъкидлаш керакки, Саид Азиз Алиҳусайни ушбу қисқа муддатли меҳнат фаолияти давомида ўз тажрибаларини ишга солган ҳолда турли халқаро мусобақаларда фаол иштирок этган Ўзбекистон оғир атлетикачиларини тайёрлаш ва назорат қилишда салмоқли ютуқларга эришиб, Париж-2024 Олимпия ўйинларига лицензияси учун муҳим рейтинг очколари қўлга киритилишига ҳисса қўшди.

Ўзбекистон терма жамоаси унинг қўл остида 3-13 май кунлари Жанубий Кореянинг Жинжу шаҳрида ўтказилган Осиё чемпионатида 2 олтин, 4 кумуш ва 5 бронза медалини қўлга киритди. Бундан ташқари, 4-17-сентябрь кунлари Саудия Арабистонининг Ар-Риёд шаҳрида бўлиб ўтган катталар ўртасидаги жаҳон чемпионатида 3 та олтин, 2 та кумуш ва 1 та бронза медалига сазовор бўлишига муносиб ҳисса қўшди.

Бундан ташқари, унинг мураббийлик маҳорати жамоани Ханчжоу шаҳрида бўлиб ўтган ХИХ Осиё ўйинларида 2 та кумуш ва 2 бронза медалини қўлга киритишида катта кўмак берди. Ушбу мусобақалар давомида Саид Азиз Алиҳусайнининг ҳақиқий профессионал дф фидойи эканини кўрсатди.

Афсуски, Ўзбекистон оғир атлетика федерациясининг шартномани узайтириш таклифига қарамай, Саид Азиз Алиҳусайни шахсий сабабларга кўра ўз фаолиятини давом эттирмасликка қарор қилди. Шундай бўлсада, федерация унинг спортчиларга берган беқиёс хизмати, ажойиб маслаҳатлари, фикр-мулоҳазалари ва қўллаб-қувватлашини қадрлайди.

Ўзбекистон Оғир атлетика федерацияси Саид Азиз Алиҳусайни мураббийлик фаолиятини давом эттиришга қарор қилганда, унинг учун федерация эшиклари ҳар доим очиқлигини билдиради," - дейилади хабарда.