Ўзбекистон Қаҳрамони Қувондиқ Санақулов: "Зафарли одим 2025 йилда ҳам давом этади"

Ўзбекистон Қаҳрамони Қувондиқ Санақулов бундан буён мамлакат гандбол федерациясига раислик қилади. Янги раҳбар барчани байрам билан табриклар экан, янги 2025 йилда ҳам спортчиларимизнинг муваффақиятли одими давом этишига ишонишини айтди. 

"Азиз ҳамюртлар! Сизларни қутлуғ қадамлар билан кириб келаётган Янги - 2025 йил билан табриклайман. Ортда қолаётган йил ўзбек спорти тарихига зарҳал ҳарфлар билан битилди. Спортчиларимиз Олимпиада ва Паралимпия ўйинларида, жаҳон ва Осиё чемпионатларида мисли кўрилмаган натижаларга эришдилар. 

Албатта, бу қалбимизга ғурур ва фахр ҳиссини бағишлади. Ишончим комил, янги йил ҳам бундан мустасно бўлмайди. Зафарли спортчиларимиз анъанани давом эттириб, давлатимиз байроғини янада сарбаланд қилишади. 

Янги йилда хуш кайфият, соғлик ва саломатлик, омад ва муваффақият Сизларни асло тарк этмасин. Файзу барака, тўкин-сочинлик ва фаровонлик оилангиз ҳамроҳига айлансин. Айёмингиз муборак бўлсин!"

Ҳурмат билан Қувондиқ Санақулов, Ўзбекистон Қаҳрамони, мамлакат гандбол федерацияси раиси