Ўзбекистон Регби федерацияси Ижроия қўмитасининг навбатдаги йиғилиши бўлиб ўтди

Видеоконференцалоқа режимида ўтказилган Ижроия қўмитасининг йиғилишида ташкилий масала кўриб чиқилди. Ўзбекистон Регби федерацияси биринчи вице-президенти лавозимига Ўзбекистон Республикаси Мудофаа вазири ўринбосари Aлишер Нарбаев, Ўзбекистон Миллий университети проректори Файзулла Думаев Ижроия қўмита аъзоси этиб сайланди. Шунингдек, Зиёвиддин Бадриддинов Ўзбекистон Регби федерацияси Ижроия қўмитасига сайланди.

Бундан ташқари, Ўзбекистон Регби федерацияси Низомидаги ўзгаришларни тасдиқлаш масалалари кўриб чиқилди. Осиё Регби федерацияси "Asia Rugby" га, " IRB" эса " World Rugby" га ўзгартирилди.

Қолаверса, федерация ва вилоят регби федерациялари ўртасидаги функциялар ҳам ўзгарди. Мажбурият ва вазифаларни қайта кўриб чиқиш ва функциянинг бир қисмини минтақавий федерацияларга топширишга қарор қилинди.

Содиқ Сафоев Ижроия қўмитаси аъзолари ва Ўзбекистон Регби федерацияси биринчи вице-президенти сайланиши тўғрисида фикр билдирар экан, мамлакатимизда регби спортини ривожлантириш ва халқаро мусобақаларда катта ютуқларга эришишда Ўзбекистон Республикаси Президенти томонидан қўйилган вазифаларни бажариш муҳимлигини таъкидлади.

Регби спорт турини янада ривожлантириш мақсадида аёллар ўртасида 8 март - Халқаро хотин-қизлар куни муносабати билан аёллар жамоалари ўртасида регби мусобақасини ўтказиш масаласи ҳам кўриб чиқилди.