Ўзбекистон регби федерациясининг навбатдан ташқари ҳисобот-сайлов конференцияси ўтказилди

Тадбирни Ўзбекистон Республикаси Олий Мажлиси Сенати раисининг биринчи ўринбосари, Ўзбекистон регби федерацияси раиси Содиқ Сафоев очар экан, 2022 йилда мамлакатимизда регбини ривожлантириш ва оммалаштириш борасидаги ишларни сарҳисоб қилди. 

С.Сафоев федерация олдида турган асосий вазифаларни белгилаб, мутасаддиларга федерациянинг 2023 йилга мўлжалланган иш режасини ишлаб чиқиш ва тасдиқлаш, хусусан, регби базаси қурилиши, миллий терма жамоаларнинг халқаро мусобақаларда иштирок этишини таъминлаш бўйича вазифаларни белгилаб берди. Шунингдек, регбига ёшларни, талабаларни, мактаб ўқувчиларини ва аҳолининг бошқа қатламларини янада кенг жалб қилиш масалалари муҳокама қилинди.

Анжуманда онлайн иштирок этган Спортни ривожлантириш вазирининг ўринбосари Шаҳрулло Маҳмудов ва Жамоавий спорт турлари бўйича Республика олий спорт маҳорати мактаби директори Жасур Акрамов ҳарбий хизматчилар ўртасидаги жаҳон чемпионатида ҳамюртларимизнинг иштироки, Тошкент вилояти мезбонлик қилган U-20 ёш тоифасидаги Осиё чемпионатида терма жамоамизнинг эришган ютуқларини алоҳида таъкидладилар.

Конференция давомида сўзга чиққан федерация Бош котиби Қаҳрамон Жалилов 2022 йил учун ўтказилган йиғинлар ва терма жамоаларнинг халқаро мусобақалардаги иштироки бўйича йиллик ҳисоботини тақдим этди. Шундан сўнг кун тартибига мувофиқ федерация Ижроия қўмитаси ва Тафтиш комиссиясининг янги таркибини тасдиқланди.

Федерация раиси ҳисобот-сайлов конференцияси якунларини сарҳисоб қилар экан, Ўзбекистон Республикаси Президенти Ш.Мирзиёев томонидан 2023 йил мамлакатимизда спортни ривожлантириш бўйича улкан мақсад ва вазифалар белгилаб берилганини таъкидлади. Федерация ходимларидан масъул ташкилотлар билан биргаликда белгиланган вазифаларни бажариш учун бор куч-ғайратини ишга солишлари сўради.