Ўзбекистон спорт курашлари ассоциацияси мутасаддилари масофадан туриб самарали иш олиб боришяпти ФОТОРЕПОРТАЖ

Хабарингиз бор, коронавирус пандемияси сабаб юзага келган ҳозирги карантин ҳолатида давлат ва нодавлат жамоат ташкилотлари, турли муассасалар ўз иш фаолиятларини масофавий тарзда олиб боряпти. Барчамиздан уйда қолиш сўралмоқда. Зеро, фақат шу йўл орқалигина тезроқ коронавирус балосидан қутулиш мумкин.  

Хусусан, Ўзбекистон спорт курашлари ассоциациясида ҳам иш тўхтаб қолгани йўқ. Бугунги ахборот технологиялари яшин тезлигида тараққий этиб бораётган замонамизда ассоциация раҳбарияти, ходимлар, мураббийлар фаолияти масофадан туриб давом эттириляпти.

Телеграм ижтимоий тармоғида махсус канал очилган бўлиб, у ерда доимий ахборот, маълумот алмашиш йўлга қўйилган. Мураббийлар спортчиларимизнинг карантин давридаги ҳолати, уларнинг соғлиқлари ҳақида кунлик маълумотларга эга бўлиб боришяпти. Ҳар бир курашчи кунига икки маҳалдан тана ҳарорати ҳақидаги маълумотни телеграм каналига ташлайди.

Кунлик машғулотлардан ташқари, карантин даврида бўш вақт кўп бўлишини инобатга олган ҳолда ассоациция мутасаддилари ўзига хос челленжни йўлга қўйишган. Ушбу челленж "отжимание"дан бошланди ва спортчилар, мураббийлар эстафета тарзида бир-бирларига чақирув эълон қилишди. Бу жараён ҳам ўз ўрнида бўш вақтни мазмунли ўтказиш учун хизмат қиляпти.

- Шунингдек, карантин даврида оила аъзоларимиз учун ҳам ҳар қачонгидан-да кўпроқ вақт ажратяпмиз, фарзандларимиз билан бирга машғулот ўтказяпмиз, дарс тайёрлаяпмиз, - дейди Ўзбекистон спорт курашлари ассоциацияси бош котиби Шуҳрат Мамадалиев. - Ассоциациянинг ҳар бир ходими, спортчилар, оила аъзоларимиз билан бирга ҳукуматимизнинг барча тавсияларига амал қилган ҳолда уйда қолишга қарор қилдик. Шахсан ўзим одатдаги иш режимида оилам учун кам вақт ажратаётган эдим. Буни тан олиш керак. Энди эса фарзандларим билан кўпроқ вақт ўтказяпман. Биргаликда машғулот қиляпмиз, дарс тайёрлаяпмиз. Тушлик ва кечки овқатни бирга тайёрлаяпмиз, ўйинлар ўйнаймиз, ҳовлида спорт билан шуғулланяпмиз, фильмлар томоша қилиб, ўқиган китобларимизни муҳокама қиламиз. Aлбатта, иш ҳам кўп вақтни олади. Барча ишларимни масофавий тартибга ўтказиб олганман. Ҳозирда ассоциация ишини онлайн кузатиб боряпман. Ишонаманки, биз бор имкониятлардан унумли фойдаланиб, Олимпиадага тайёргарлик босқичини кўнгилдагидек ўтказамиз. Мен барчани уйда қолишга чорлайман! Келинг, эпидемия барҳам топишига ҳисса қўшайлик.    

Ўйлаймизки, ҳукуматимиз сўраётган талабларга тўлиқ риоя қилсак, коронавирус пандемиясини енгиш осон ҳамда тезроқ амалга ошади.