Ўзбекистон сумо бўйича Жаҳон чемпионатида илк бор медалга эга чиқди

Дунёнинг 33 давлатидан жами 200 нафарга яқин спортчилар иштирок этган мусобақада Ўзбекистон терма жамоаси аъзолари ҳам ғолиблик учун кураш олиб борди.

Терма жамоамиз таркибида Абдуқодир Усмонов (80 кг), Маҳмуджон Мақсудов (115 кг), Фаридахон Тўлашова (73 кг) ҳамда Дурдона Абдужабборова (мутлақ оғир вазн) мусобақада юртимиз шарафини ҳимоя қилди.

Ааҳамиятлиси, Ўзбекистондаги илк сумочи — Дурдонахон Абдужабборова Жаҳон чемпионатининг бронза медалига эга чиқди. У турнир давомида иккита ғалаба ҳамда иккита мағлубиятни қайд этди. Унинг вазн тоифасидаги ғолиблик украиналик Ирина Пасечникка насиб этди. Норвегиялик Катрин Фрилсет кумуш медални қўлга киритган бўлса, иккинчи бронза медалига япониялик спортчи Айри Ҳисано эгалик қилди.

Маълумот ўрнида, Ўзбекистон сумо федерацияси 2023 йил октябрь ойида ташкил топган эди.