Ўзбекистон тажрибаси FISU томонидан халқаро даражада эътироф этилди

Тадбир доирасида мутахассислар, академиклар ва спорт соҳаси етакчилари иштирокида бир қатор мавзуларга оид муҳокамалар ташкил этилиб, унда Ўзбекистон талабалар спорти ассоциацияси вакиллари ҳам фаол иштирок этди.

Мулоқот давомида Ассоциация вакиллари томонидан Ўзбекистонда талабалар спортини ривожлантиришда жорий этилган замонавий, самарали бошқарув тизими юзасидан тақдимот ўтказилди.

Таъкидлаш жоизки, Ўзбекистоннинг ушбу тажрибаси Халқаро талабалар спорти федерацияси (FISU) томонидан юксак эътироф этилиб, уни халқаро амалиётга татбиқ этиш имконияти алоҳида қайд этилди. Бу эътироф мамлакатимизда талабалар спорти соҳасида амалга оширилаётган тизимли ислоҳотлар самарадорлигининг амалий ифодасидир.

Шунингдек, учрашув доирасида Марказий Осиё талабалар спорти федерациясининг ташкил этилгани ва унинг устувор йўналишлари халқаро миқёсда қўллаб-қувватланди ҳамда FISU президенти Леонз Эдер томонидан Ўзбекистон талабалар спорти ассоциацияси раиси ўринбосари Эркин Қодировнинг Марказий Осиё талабалар спорти федерацияси Бош котиби этиб тайинлангани расман тасдиқланди.