Ўзбекистон тарихда илк бор хоккей бўйича ёшлар ўртасидаги жаҳон чемпионатида иштирок этади, жамоамиз тақвими ҳам маълум

Бунга қадар Ўзбекистон хоккей мактаблари тарбияланувчиларидан ташкил топган U18 ёшлар терма жамоаси Осиё ва Океания Кубогида икки марта ғолиб бўлиб, ҳеч бир ўйинда мағлубиятга учрамаган. Турнир 2023 йил март ойида Улан-Баторда (Мўғулистон) ва 2024 йил апрель ойида Тошкент ҳамда Самарқандда (Ўзбекистон) бўлиб ўтган.

Жаҳон чемпионатидаги дебют турнирида Ўзбекистон ёшлари Жанубий Африка Республикаси, Люксембург, Туркманистон, Босния ва Герцеговина ҳамда Таиланд ёш жамоаларига қарши майдонга тушишади.

Турнир тақвими:

28 февраль, 14:30 — Ўзбекистон -  Жанубий Африка Республикаси

1 март, 14:30 — Люксембург - Ўзбекистон 

3 март, 14:30 — Туркманистон - Ўзбекистон 

4 март, 11:00 — Ўзбекистон - Босния ва Герсеговина

6 март, 18:00 — Таиланд - Ўзбекистон 

Халқаро Хоккей Федерацияси (IIHF) турнирнинг сўнгги учрашуви сифатида Таиланд ва Ўзбекистон жамоалари ўртасидаги баҳсни белгилаган, бу эса айнан шу икки жамоа мусобақанинг асосий фаворитлари сифатида кўрилаётганини англатади.

Жанубий Африка жамоаси аутсайдер сифатида кўрилмоқда, Люксембург эса ўтган йилги турнирни ўтказиб юборган. Қолган уч рақиб эса жиддий рақобатчи бўлиши мумкин.

Биз ёшларимизга ишонамиз ва умид қиламизки, Чехияда мавсумни ўтказган Жасурбек Рустамхонов ва Салоҳиддин Азимов иштирокида кучайган жамоамиз жаҳон чемпионатида муносиб дебют қилади ҳамда ғалаба ва юқори дивизионга чиқиш учун курашади.