Ўзбекистон терма жамоаси бош мураббийи Марат Қурбоновга "Президент совғаси" топширилди + ФОТО

Мусобақада ўзбекистонлик чарм қўлқоп усталари ҳар қачонгиданда муваффақиятли иштирок этиб, 3 та олтин, 1 та кумуш ва 1 та бронза медалларини қўлга киритишганди. Бундай рекорд натижанинг қайд этилишида миллий терма жамоамиз устози Марат Қурбоновнинг ҳам улкан ҳиссаси бор. Шуни инобатга олган ҳолда бугун Марат Галиевичга Президент совғаси - "Трекер" автомобили ва 100 миллион сўм миқдоридаги мукофот пули учун сертификат топширилди.

Тажрибали мураббийга совға тантанали равишда, Миллий олимпия қўмитаси биноси олдида топширилди. Унда Ўзбекистон Миллий олимпия қўмитаси президенти Рустам Шоабдураҳмонов, МОҚ вице-президенти ва Ўзбекистон бокс федерацияси раисининг биринчи ўринбосари Сакен Полатов, МОҚ ва Ўзбекистон бокс федерацияси мутасаддилари иштирок этишди. 

Тадбирда сўзга чиққан Рустам Шоабдураҳмонов ва Сакен Полатов мана шундай меҳнат, фидойилик ва албатта юксак натижалар учун Марат Қурбоновга миннатдорчилик билдиришди. Ўз навбатида мураббий кўрсатилган эътибордан хурсанд эканлигини, терма жамоамиз бундан кейин ҳам мана шундай темпда юқори натижалар кўрсатишда давом этишини таъкидлаб ўтди.

Ўзбекистон бокс федерацияси матбуот хизмати