Ўзбекистон ва Жанубий Корея ўртасида спорт илмий тадқиқотлари бўйича ҳамкорлик йўлга қўйилади

Тадбирда Ўзбекистон жисмоний тарбия ва спорт илмий тадқиқотлар институти директори ўринбосари М.Арзиқулов, институт тадқиқотчилари ва олимлари, шунингдек, Корея спорт фанлари институти бошқарма бошлиқлари Квон Ил Ким, Хонг Сун Сонг, етакчи профессор ва тадқиқотчилари иштирок этди.

Корея спорт фанлари институти 1980 йилда ташкил этилган бўлиб, спорт соҳасидаги давлат сиёсатини ишлаб чиқиш, илмий ёндашувлар асосида миллий ва халқаро мусобақалардаги кўрсаткичларни яхшилаш ва спорт саноатини ривожлантириш бўйича мамлакатдаги ягона илмий тадқиқот муассасаси саналади. Унинг таркибида бир нечта илмий лаборатория ва спорт фанларига бағишланган қўлланмалар йиғилган йирик кутубхона фаолият олиб боради.

Учрашувда икки давлат спорт тадқиқотларига ихтисослашган муассасалари ўртасида яқин ҳамкорлик алоқаларини ўрнатиш масаласи муҳокама қилинди. Ёш иқтидорли спортчиларни аниқлаш, уларнинг жисмоний тайёргарлигини кучайтириш бўйича илмий асосланган фаолиятни ривожлантириш, халқаро мусобақаларда юқори кўрсаткичларни қайд этишга қаратилган дастурий чора-тадбирларни ишлаб чиқиш ва бошқа йўналишларда фикр алмашилди.

Жумладан, онлайн-мулоқот иштирокчилари Ўзбекистон ва Жанубий Кореяда спортни ривожлантириш ва оммалаштириш соҳасида олиб борилаётган давлат сиёсати ўзаро ўхшашлиги ва шу сабабли истиқболда ўзаро манфаатли алоқаларни кенгайтириш учун кенг имкониятлар мавжудлигини таъкидлашди.

Учрашув якунида Ўзбекистон жисмоний тарбия ва спорт илмий тадқиқот институти ҳамда Жанубий Корея спорт фанлари институти ўртасида ҳамкорлик тўғрисидаги англашув меморандумини имзолашга келишиб олинди. Мазкур хужжат асосида томонлар биргаликда илмий-тадқиқот ишларини олиб бориш, спортчиларни тайёрлаш ва спорт сиёсатини такомиллаштириш соҳасида тажриба алмашиш ҳамда келажакда иккала институт мутахассисларининг ўзаро ташрифларини амалга ошириш кўзда тутилган.