10 мар 17:47
Янгиликлар

Спорт курашлари

Ўзбекистон ва Қирғизистон классиклари қўшма машғулот ўтказади

Эртадан юнон-рум кураши бўйича Ўзбекистон ва Қирғизистон терма жамоаларининг халқаро қўшма ўқув-машғулот йиғини бошланади.

Ён қўшниларимиз пойтахтимизга асосий таркиб билан етиб келишди. Қўшма машғулот эртага Тошкент вилоятининг Ангрен шаҳарчасида жойлашган "Янгиобод" спорт базасида бошланади ва 27 мартга қадар давом этади.

Ушбу йиғин ҳар икки терма жамоа аъзолари учун ҳам 9-11 апрель кунлари Қозоғистоннинг Алмати шаҳрида ўтказиладиган Токио Олимпиадаси учун Осиё лицензион турнирига тайёргарлик босқич вазифасини ўтаб беради. Машғулотлар кунига икки маҳалдан белгиланган.

Эслатиб ўтамиз, юнон-рум курашчиларимиздан Элмурат Тасмурадов (63 кг), Жалгасбай Бердимуратов (77 кг) ва Рустам Ассакалов (87 кг) Токио Олимпиадаси йўлланмасини қўлга киритиб улгурган.