Ўзбекистон ва Россия жисмоний тарбия ва спорт таълими соҳасида ҳамкорлик қилади

Мураббийлар ҳамда жисмоний тарбия мутахассисларининг малакасини ошириш йўналишларида таълим самарадорлигини ошириш борасида Жисмоний тарбия ва спорт бўйича мутахассисларни қайта тайёрлаш ва малакасини ошириш институти томонидан бир қатор ишлар амалга ошириб келинмоқда.

Хусусан, яқинда институтга А.И.Гертсен номидаги Россия давлат педагогика университети “Таълим ва ривожланиш психологияси” кафедраси ҳамда П.Ф.Лесгафт номидаги Санкт-Петербург миллий давлат жисмоний тарбия, спорт ва саломатлик университети “Адаптив спорт турлари назарияси ва методикаси” кафедраси профессори, психология фанлари номзоди, педагогика фанлари доктори Андрей Грецов ташриф буюрди.

Фахрий меҳмон дастлаб институт ўқув хоналари, улардаги кўргазмали қуроллар, ахборот ресурс маркази билан танишди. Шундан сўнг, умумтаълим мактабларининг жисмоний тарбия фани ўқитувчилари, пара таекwондо ҳамда пара енгил атлетика гуруҳлари тингловчилари билан суҳбат олиб борилди. 

Бу жараёнда болалар психологияси, адаптив спортда спортчининг психологик тайёргарлиги, уларни мусобақаларга пухта руҳий тайёргарлик кўриши борасида сўз юритилди. 

Шунингдек, А.Грецов тингловчиларни қизиқтирган саволларга ҳам жавоб қайтарди. Қолаверса, институт профессор-ўқитувчилари билан ҳам илмий тадқиқот, адабиётлар ва ўқув жараёни борасида ўзаро фикр алмашилди.