Ўзбекистон замонавий бешкураш федерацияси Япония шаҳри билан ҳамкорлик битимини имзолади

Онлайн имзоланган келишувга биноан, Токио-2020 Олимпия ўйинлари якунида спортчилар, мураббийлар ва бошқа ходимларидан иборат Ўзбекистон замонавий бешкураш федерациясининг расмий делегацияси 3 кун давомида Хидака шаҳрига ташриф буюриб, у ерда турли спорт ва маданий тадбирларда иштирок этади. Ушбу ҳамкорлик дастури бўйича барча харажатлар мезбон томонидан қопланади. Тадбир давомида Ўзбекистон замонавий бешкураш федерацияси раиси Баҳромжон Газиев ҳамкорлик ҳақидаги фикрларини айтиб ўтди.

«Хидака шаҳри билан ҳамкорлик дастури бўйича музокараларимиз 2019 йил декабрида бошланган. Пандемия тўсатдан бошлангани сабабли ҳамма нарсани тўхтатишга мажбур бўлиб қолдик. Бахтимизга Япония ҳукуматининг Токио-2020 ўтказилишига масъул вакиллари бир неча ой олдин бошланган музокараларни давом эттиришимизни қўллаб-қувватлади. Бугун биз ҳар икки томоннинг саъй-ҳаракатлари билан ҳамкорлик битимини имзолаганимизни мамнуният билан эълон қиламиз. Бу йил Токио Олимпиадаси пайтида қатъий карантин чекловлари қўйилган ҳолда Япония урф-одатлари ва маданиятига бағишланган ушбу дастур, айниқса, долзарбдир”, – деди Баҳромжон Газиев.

Эслатиб ўтамиз, ўзбек спортида илк бор Токио Олимпиадасида замонавий бешкураш йўналишида Олимпия ўйинларига лицензия қўлга киритилган. Бўлажак Олимпия ўйинларида Александр Савкин ҳамда Алисэ Фахрутдинова юртимиз шарафини ҳимоя қилишади.