Ўзбекистонда волейбол янада ривожлантирилади

Қарорга кўра, 2025 йилдан бошлаб, ҳар йили Республика ҳудудида анъанавий тарзда қуйидаги мусобақалар ўтказиб борилади:

— олий таълим муассасалари талабалари, профессионал таълим ва умумий ўрта таълим муассасалари ўқувчилари ўртасида "Volleyball Stars" Ўзбекистон кубоги;

— вазирлик ва идоралар ходимлари ўртасида уч босқичли (туман (шаҳар) – вилоят – республика) ўртасида "Янги Ўзбекистон" республика мусобақаси;

— умумий ўрта таълим муассасалари, юқори синф ўқувчилари ўртасида уч босқичли мактабгача ва мактаб таълими вазирлиги кубоги;

— ногиронлиги бўлган шахслар ўртасида пара волейбол спорт мусобақалари.

2025 йилдан бошлаб, ҳар икки йилда бир маротаба волейбол бўйича Марказий Осиё волейбол ассоциацияси (CAVA)га аъзо давлатлар ўртасида "Буюк Ипак йўли" халқаро турнири ўтказиб борилади.

Наманган вилоятининг Учқўрғон тумани олимпия ва миллий спорт турлари бўйича давлат ихтисослаштирилган мактаб-интернати волейбол спорт турларига ихтисослаштирилган давлат мактаб-интернати сифатида қайта ташкил этилади.