Ўзбекистонда замонавий бешкурашни ривожлантириш учун 5 та федерация билан яқиндан ҳамкорлик қилинади

Бу борада федерацияда иш қизғин кечмоқда.

Бугун, 26 декабрь куни Миллий олимпия қўмитасида замонавий бешкураш спортини ривожлантириш, оммалаштириш мақсадида Ўзбекистон енгил атлетика, қиличбозлик, йилқичилик ва от спорти, сузиш ҳамда ўқ отиш спорти федерациялари ўртасида ўзаро ҳамкорлик ва шерикчилик бўйича меморандум имзолаш маросими ташкил этилди. Тадбирда юқорида санаб ўтилган федерациялар вакиллари, шунингдек, Миллий олимпия қўмитаси мутасаддилари иштирок этишди, деб хабар қилмоқда МОҚ матбуот хизмати.

Сир эмаски, замонавий бешкураш осон бўлмаган спорт турларидан бири ҳисобланади. Чунки, ушбу спортда атлетлар бешта йўналиш - югуриш, қиличбозлик, от спорти, сузиш ҳамда ўқ отиш бўйича кураш олиб борадилар. Спортчи мазкур йўналишларнинг ҳар бирига алоҳида тайёргарлик кўриши лозим. Бунинг замирида эса тинимсиз меҳнат, катта машаққат ётади. Шу сабабдан ҳам, бешкурашни ривожлантириш фақатгина бир федерацияга боғлиқ эмас. Бугунги тадбир давомида ҳамжиҳатликда иш олиб бориш, бешкураш талабларига жавоб бера оладиган атлетларни саралаб олиш, тажрибали мураббийлардан иборат кенгаш тузиш ва бошқа масалалар муҳокама қилинди. Ўз навбатида федерациялар вакиллари ҳамкорлик қилишга, ўзлари томонидан амалий ёрдам кўрсатишга тайёр эканликларини маълум қилдилар.

Шундан сўнг тадбирнинг асосий қисми - меморандум имзолаш маросими ташкил қилинди.

Маълумот ўрнида, Токио 2020 Олимпиадасига замонавий бешкураш бўйича Осиё қитъаси вакиллари учун 5 та лицензия ажратилган. Ўзбекистон ана шу бешта йўлланмадан бирига эга чиқиш учун етарли салоҳиятга эга. Шундай экан, 2019 йилнинг ноябрь ойида ўтказиладиган лицензион мусобақада юқорида санаб ўтилган федерация масъуллари, мураббий ва спортчиларга омад, муваффақият ва албатта куч-қувват тилаб қоламиз.