Ўзбекистонлик дзюдочи Париж Олимпиадасидаги мағлубиятдан сўнг фаолиятини якунлади

Дзюдо бўйича Ўзбекистон терма жамоаси аъзоси Гулноза Матниязова (70 кг) Париж Олимпиадасидаги иштирокини нимчорак финалда якунлаган эди. Мазкур мағлубиятдан сўнг ҳамюртимиз ўз фаолиятини якунлаши ҳақида эълон қилди:

"Қаерда ва қай ҳолатда бўлмайлик, пешонамизга ёзилган ерда бўламиз. Фақат содир бўлиши лозим нарсагина содир бўлади. Ҳамма нарса ўз вақтида бошланади ва ўз вақтида тугайди. Демак, шундай бўлиши керак экан. Ҳар бир куним учун Аллоҳимга беҳисоб шукур айтаман. Мени қўллаб-қувватлаб турган ота-онамга, турмуш ўртоғимга ва яқинларимга, шунингдек, Дзюдо федерциясига, дзюдо оиласига раҳмат айтаман. Шу ергача қанча қийинчикларни босиб ўтдик. Париж Олимпиадаси сўнгги мусобақам эди. Жамовий беллашувлардан кейин мен ўз спорт фаолиятимни якунлайман. Мени қўллаб-қувватлаб турган барчага раҳмат айтаман. Энди кўпроқ оилам даврасида бўламан, ИншаАллоҳ", деб ёзди Матниязова.

Маълумот учун Гулноза Матниязова айни дамда 29 ёшда. Париж Олимпиадаси унинг фаолиятидаги учинчи Олимпия ўйинлари бўлди.