Ўзбекистонлик икки оғир атлетикачининг допинг-синамасида тақиқланган моддалар аниқланди

Бу ҳақда Ўзбекистон Миллий антидопинг агентлиги маълум қилди.

Жорий йил сентябрь ойида катталар ва ёшлар ўртасида ўтказилган Ўзбекистон кубоги мусобақасида Комилжон Ибрагимов ва Муслимбек Турсунбоевдан допинг-синамалар олинган.

Таҳлил натижаларига кўра, Ибрагимовнинг синамасида фуросемид, Турсунбоевникида эса метенолон (metenolone) — анаболик-андроген стероид аниқланган.

Мазкур моддалар Бутунжаҳон антидопинг агентлиги — WADA'нинг 2026 йилги тақиқланган моддалар ва усуллар рўйхатига киритилган. Улардан мусобақа вақтида ҳам, мусобақадан ташқари даврда ҳам фойдаланиш тақиқланган.

Ҳозирда ҳолатлар юзасидан белгиланган тартибда ўрганиш ишлари олиб борилмоқда. Текширувлар якунланиб, тегишли қарор қабул қилингач, Миллий антидопинг агентлиги расмий баёнот беришини маълум қилган.