Ўзбекистонлик жаҳон чемпионлари 50 миллион сўм пул мукофоти билан тақдирланди + ФОТО

Мусобақада ҳамюртларимиз Адҳамжон Эргашев ва Акбар Жўраев 3 тадан олтин медаль қўлга киритишганди. Бугун пойтахтимиздаги "Олимпия шон-шуҳрати" музейида жаҳон чемпионатида муваффақиятли иштирок этган спортчиларимиз ва уларнинг мураббийларини тақдирлаш маросими ташкил этилди. 

Тадбирда Ўзбекистон Республикаси Жисмоний тарбия ва спорт вазирлиги, Миллий олимпия қўмитаси, оғир атлетика федерацияси раҳбарияти вакиллари иштирок этишди. Унда мусобақада муваффақиятли қатнашган атлетларимиз Адҳамжон Эргашев ва Акбар Жўраевга Ўзбекистон Республикаси Президентининг стипендияси - 50 000 000 сўм миқдоридаги пул мукофоти учун сертификат тақдим этилди. Уларнинг мураббийлари эса 20 000 000 сўмлик пул мукофоти билан тақдирланадиган бўлди. 

Жаҳон чемпиони Адҳамжон Эргашев сўзга чиқар экан, кўрсатилган эътибор учун Президентимизга, Жисмоний тарбия ва спорт вазирлиги, Миллий олимпия қўмитаси, шунингдек оғир атлетика федерациясига ўз миннатдорчилигини билдириб ўтди.