Ўзбекистонлик мураббий Япониядаги нуфузли семинарда иштирок этяпти ФОТОГАЛЕРЕЯ

Бир ойга мўлжалланган ушбу семинарда Хитой, Саудия Арабистони, Покистон, Мьянма, Исроил, Сурия ва Ўзбекистондан таклиф этилган мураббийлар иштирок этишяпти ҳамда ўз тажрибаларини оширишмоқда. 

Юртимиздан мазкур семинарга истеъдодли мураббий Муҳаммад Беҳзод Бахтиёров таклиф этилган. Семинарга Олимпиада чемпиони, Япония терма жамоаси мураббийи Косей Иноуэ бошчилик қиляпти. 

Бир ойлик семинар якунида мураббийларга Японияда малакасини оширганлиги ҳақидаги тегишли диплом, сертификат ва гувоҳнома топширилади. Мураббийлар ўз юртларига қайтганларидан сўнг Кунчиқар мамлакатда ўрганган билимларини семинар тариқасида ёш ҳамкасблари ҳамда ҳакамларга ўтишади.      

Маълумот учун, Токиода бошланган халқаро мураббийлик семинари айни кунларда пойтахтдан 50 км узоқликда жойлашган Канагава шаҳрида давом этмоқда. Шундан сўнг мураббийлар 22-24 ноябрь кунлари Япониянинг Осака шаҳрида ўтказиладиган “Катта Дубулға” туркумига кирувчи нуфузли турнирни томоша қилишади.